هاردا مسلمان گؤرورم قورخورام

هاردا مسلمان گؤرورم قورخورام
یازان:میرزه علی‌اکبر صابیر

پا-یى پییاده دوشورم چؤللره، 
خار-ى موغیلان گؤرورم، قورخمورام.
سئیر ائدیرم برر و بییابانلارى، 
غول-ى بییابان گؤروره م، قورخمورام.
گاه اولورام بحرده زؤورق نیشین، 
دالغالى طوفان گؤرورم، قورخمورام.
گه چیخیرام ساحیله هر یاندا من، 
وحشى-یى غورران گؤرورم، قورخمورام.
گاه شفق تك دوشورم داغلارا، 
یانقیلى وولقان گؤرورم، قورخمورام.
گاه انیرم سایه تك اورمانلارا، 
ییرتیجى حئیوان گؤرورم، قورخمورام.
اوز قویورام گاه نئییستان لارا، 
بیر سورو آسلان گؤرورم، قورخمورام.
مقبره لیكده ائدیرم گه مكان، 
قبریده خورتان گؤرورم، قورخمورام.
منزیل اولور گه منه ویرانه لر، 
جین گؤروروم، جان گؤرورم، قورخمورام.
خاریجى مولكونده ده حتّا گزیب، 
چوخ تؤوحه ، اینسان گؤرورم، قورخمورام.
بو كوره-یى عرضده من موختصر، 
موختلیف الوان گؤرورم، قورخمورام.
لئیك بو قورخمازلیق ایله دوغروسو، 
آى داداش! واللاهى، بیللاهى، تیللاهى؛ 
هاردا موسلمان گؤرورم، قورخورام! 
قورخورام!، قورخورام!، قورخورام!.....
بی‌سبب قورخمورام، وجهی وار 
نئیله ییم آخیر، بو پوخ اولموشلارین، 
فیكرینى قان قان گؤروره م، قورخورام!. 
قورخورام!، قورخورام!، قورخورام!...