میرزاعلی معجز شبستری - فلاکت

میرزاعلی معجز شبستری

فلاکت

اوخوردی مرثیه‌خوان من باخیردیم حیرتله

ووروردی باشه جماعت کمال شبدّتله

رفیق قووزادی باشین دئدی: أییل آشاغا

دئدیم: نییه؟ دئدی: همرنگ اول جماعتله

روا دگیل باخاسان خارجی کیمی خلقه

گرک ملول اولاسان سن ده بو مصیبتله

خولاصه مرثیه بیتدی، چکیلدی یا الله

گؤتوردیک ال طرف کبریایه میلتله

دؤشندی سوفره یئره، خونچۀ پلو گلدی

قارین‌لار اولدی چراغان او دادلی نعمتله

یانیردی پینج او مجلسده، خلق ترلردی

ولیک قار یاغیردی ائشیکده شیدتله

ییغیلدی سوفره تمام اولدی مجلس عشرت

ایاغه دوردی جماعت یئریندن عیزتله

عباسینی گؤتورن ائیلدی خوداحافیظ

یولا سالیردی قوناقچی بیزی نزاکتله

فناریلر یاخیلیب کوچه چون ایشیقلاندی

دئدیم رفیقه باخ ایندی اویانه دیقتله

باخوب نه گؤردی، پریشان، بینوا بیر جمع

آیاق یالین، بدن عریان، دوروبلار ذیلتله

نه رنگ واردی نه قان یوزلرینده دم بسته

باخیردی خلقه او بی‌نور گؤزلر حسرتله

دئدیم رفیقه گؤرورسن او طیفل-معصومی

دوداق‌لاری گؤگریب جنگ ائدیر طبیعتله

او عورته نظر ائت اگلشیب بوز اوستونده

باشی آچیق، دوناجاق بو گئجه او حالتله

روا دگیل باخاسان خارجی کیمی اونا سن

عباوی سالمیاسان باشینا محبتله

جیگر کباب ائدیجی حالدور، بو حال ای دوست

نئجه گئدیب یاتاجاقسان ائوینده راحتله

رفیق یومدی گؤزون، ترلدی خجالتدن

باشین آشاغه سالیب گئچدی گئتدی سرعتله

دالینجا سسلدی معجز: رفیق دور، گئتمه

گرک کی تیتره‌یه‌سن سنده بو جماعتله

بو یاره‌لی باجی‌لار مرهم ایسته‌ییر سندن

هارا قویوب گئدیسن، خلقی مین جراحتله