ائشید ،اینانما!

ائشید ،اینانما!*

خیراللاه عمی بازاردان بیر اون دست چینی بوشقاب آلمیشدی. بیر حامبال یاخینلاشیب ،دئدی :خوجام، قوی من ائویزه بو یوکی آپاریم. خیراللاه عمی، دئدی: آپار ایشکالی یوخدی ،آمما من عوضینه پول وئره ن دئییلم، چوخ یالوارسان بیر بش جومله دییه رم، بلکه حیاتدا کاران گله بیلدی. حامبال فیکیرلشدی: ایندییه جان ایشله میشه م پول آلمیشام، نه اولوب ؟بو سفرده پول آلمارام عوضینه بش کلمه اورگه شه رم. حامبال، خیراللاه عمی یه دئدی: ایشکالی یوخدی. چینی یوکون آلدی بئلینه ،خیراللاه عمی نین دالیجا یولا دوشدی .خیراللاه عمی نین ائوینه یئتیشنده آسانسور خاراب اولموشدی، قیرخ پیلله نی گره ک چیخیب ،اؤز واحیدلرینه یئتیشردیلر. اون بئشینجی پیلله ده حامبال دیله گلدی: خیراللاه عمی  ایلک نصیحتین سویله سن؟ خیراللاه عمی، دئدی :بیر زامان دئدیلر:قارداش شهریمیزین بلدییه باشقانی عابباس ائلچین بو ایل بلدییه - ایکی ایلدن سونرا  استان - دورد ایلدن سوایی جمهور  باشقانلیقین پوللارین سیلیب سوپوروب، ائشید، اینانما! حامبال قارداش بیر یوکون بئلینده آتیب- توتوب، یولونا ایدامه وئردی .ایرمی پیلله ده دونوب ،خیراللاه عمی یه ،دئدی: ایکینجی سوزون؟ خیراللاه عمی، دئدی: ترساوا کندینده اوتوز ایلدن سونرا بیردن دئدیلر: ائلچی بئی دن سوایی بیر آیری آدام مجلیس باشقانی چیخیب، ائشید ،اینانما! حامبال قارداش بیر دوداقلارین بوزوشدوروب، یولونا ایدامه وئردی. اوتوز بئشینجی پیلله ده دالی دونمه میش ،اوجا سسله، دئدی: اوچونجی سوزون نه دی؟ خیراللاه عمی دئدی، اللی ایلدن سونرا بیردن ائشیددین ،حاکیم قدرت جنابلاری ،شهریستانیمیزین دادگاه باشقانینا ،گوزون اوستونده قاشین واردئیبلر، ائشید، اینانما! آخیر پلله ده حامبال قارداش چینی یوکون قویمامیش  یئره، دئدی: دوردونجی جومله ن؟ خیراللاه عمی، دئدی: بیردن گوردون بیزیم اولکه ده تورک قارداشلاریمیزا، بیر تورک مکتب خاناسی.......-........ حامبال قارداشیمیز داها دوردونجی جومله نی قویمادی، خیراللاه عمی قوتارسین،  آخیر پیلله ده  حامبال قارداش بئلیندن چینی لری یئره قویوب، آیاقیله اونلارا بیر تپیک ووردی، اوستن یئنیشه چینی لر گله- گله حامبال قارداش، اوز توتوب خیراللاه عمی یه ،گوله- گوله ،دئدی: آشاغیدا بیر نفر سنه دئسه بوگلن  اون دست چینی بوشقابدان  دوققوزی سینیب، بیر دستی سالیم قالیب !ائشید ،اینانما!!

گرگرلی آراز

*ائشید اینانما بیر آتابابا سوزودی بو آتا-باباسوزون بیر یارادیجی حکایه سی وار من اونو بیر بالاجا ایجازه زله عوض ائتمیشه م