اورگی یانان مسئوللارا

اورگی یانان مسئوللارا

 گیریش:

 هر گون رادیو-تئلئویزیونو ایزله‌دیکده، مسئول‌لارمیزین میلّتین معیشتی‌نین آغیر دوروما دوشدوگوندن یانیب-یاخیندیقلارینی ائشیدیب گؤرنده، گؤزلریم یاشاریر؛ اللریمی گؤیه قالخیزیب بئله اورگی یانان مسئوللار بیزه باغیش ائتدیگینه گؤره تانری‌یا، شوکرانلاریمی بیلدیریرم.

      اورگی یانان مسئوللاریمیزدان تشکّور عونوانیندا، "ماساللی فولکور اؤرنک‌لری" آدلی کیتابدا اوخودوغوم گؤزل بیر حئکایه‌نی حوضورلارینا ایتحاف ائدیرم.

                                             سایغیلارلا: عابباس ائلچین

يانديم خانعلی^*

      کربلايي حوسئين علی اوغلو خانعلی کيشي‌نين ايکي آروادي وار ايميش. بير گون کيشي‌نين کئفينه دوشور کي، بو آروادلاري سيناسين، گؤرسون اونو هانسي آرواد چوخ ايسته‌يير. کيشي ائله‌مير تنبل‌ليک "اؤلدوم، اؤلدوم" ،- دئييب وورور اؤزونو اؤلموشلوگه.

    قضادان بير نئچه گون بوندان اوّل بونلارا گلن ساليانلي قوناق دا کيشي‌يه بير بارداق ساليان دوشابي گتيرميش ايميش. دوشابي قويوبلار يوکون آلتينا کي، آغزي قيشا يئيرلر. الغرض، کيشي اوزانير اورتاليقدا، دوغرودان اؤلموش کيمي نفسيني ده چکير ايچينه. آروادلار باخير کي، بو کيشي لاپدان دوشوب اؤلدو. اوّل باشلاييللار هاراي-هشير سالماغا، سورا آروادين بيري او بيرينه دئيير:

- باشين باتسين، نه قيشقيريرسان، ايندي قونوم-قونشو تؤکو­لوب گله‌جک، اؤلو بير يانا قالاجاق، آرادا دوشابي يئييب قور­تا­راجاقلار.

ايکينجي آرواد مات-مات باخير اونون اوزون، سوروشور:

- آاز، به ناغايراخ؟

او بيري:

- نه قاييراجئيئک، گل دوشابي يئيک، سورا هاي سالاخ.

     هر ايکي آرواد ده باياق، بارداغي قويورلار اورتايا، نه بيلير­لر، نه يئييرلر. سونرا باشلاييرلار باشلارينا، ديزلرينه دؤيه-دؤيه هاي-کوي سالماغا. سسه-هايا قونشولار تؤکولوب گلير. ديپ­ديري کيشيني اوزاديرلار اوزو قيبله‌يه، باشلاييرلار آغلاماغا.

     دوشاب دا کي، اؤز ايشيني گؤرور، آروادلارا وئرير يانغيني. يا­زيق آروادلار دردلريني هئچ کسه دئيه بيلمه‌ييب، ديزلرينه وورا-وورا آغلايير، آغلايا-آغلايا دئييرلر:

- يانديم، خانعلی! يانديم، خانعلی!

خانعلی ده ائشيديرميش هر شئيي. گؤرور کي، آروادلار ديل بو­غا­زا قويمورلار، دئ باياق، قالخير آياغا، جومور آروادلارينا ساري:

- آي کؤپگين قيزلاري، سيزي يانديران خانعلی دؤيول ائی، دوشابدي!

او واختدان بو سؤز ديله-آغيزا دوشوب، مثله چئوريليب.

* ماساللی فولکور اؤرنکلری"، 2-نجی کیتاب، باکی2013