آذربایجان/ جلیل محمدقولوزاده

آذربایجان

جلیل محمدقولوزاده

.........سؤز آذربايجان وطنيمين اوستونده‌دير. بعضي واخت اوتورورام و پاپاغيمي قاباغيما قويوب فيکره گئديرم، خيالاتا جومورام، اؤزومدن سوروشورام کي:

– منيم آنام کيمدير؟ اؤز-اؤزومه ده جاواب وئريرم کي: – منيم آنام رحمتليک زؤهره بانو باجي ايدي. – ديليم نه ديلدي؟ – آذربايجان ديلي! – يعني وطنيم هارادير؟ – آذربايجان ويلايتيدير. دئمک، چونکي ديليمين آدي تورک-آذربايجان ديليدير، بئله معلوم اولور کي، وطنيم ده آذربايجان ويلايتيدير. – هارادير آذربايجان؟ – آذربايجانين چوخ حيصه‌سي ايراندادير کي، مرکزي عيبارت اولسون تبريز شهريندن؛ قالان حيصه‌لري ده گيلاندان دوتوب قديم روسيه حؤکومتي ايله عوثمانلي حؤکومتي داخيللرينده‌دير.......