خسيس جنگاور - ميخايل زوششئنکو

خسيس جنگاور

ميخايل زوششئنکو

چئويري: رشيد محمدوو

قزئتين ايداره موديري چوخ شيرينديللي، خوش اوزلو آدام ايدي. هر دفعه پولومو ايستمک اوچون يانينا گئدنده خطیريمي سوروشار، احواليملا ماراقلاناردي. هرچند کي بورجلو اولدوغو پولو اؤدهمزدي آما نئجه چتين وضعيتده اولدوغومو باشا دوشدويونو قئيد ائدر، کؤنلومو آلاردي.

ايشين غريبه طرفي اودور کي پول وئرمهمک اوچون اؤنه سوردويو سببلر چوخ واخت منه ده منطيقلي گليردي. مثلا آيين 10-دا پولو ايستمهيه گئدنده اللريني گؤيه قالديرار، حزين-حزين گولومسردي:

- سيز آللاه اؤزونوز دئيين، بئله حسابا-کيتابا سيغمايان گونده آدام هئچ پول ايستمهيه گلرمي؟ آيين 10-اودور، حالبوکي من آيين 15-ده مورتتيبلر، دامغاچيلارا، مأمورلارا پول اؤدمهلييم. منيم يئريمه سيز اولسانيز نه ائدردينيز؟

نزاکتلي ايداره موديريندن بو سؤزلري ائشيدندن سونرا من ده اونا حاق قازانديرماغا باشلاديم. آيين 10-او دوغرودان دا پول ايستمک اوچون هئچ ياخشي واخت دئييلدي…

طبيعي کي مطبعهدن اليبوش چيخارديم. بو دفعه آيين دوز 20-ده مطبعهيه اؤزومو چاتديرارديم. مني گؤرن شيرينديللي ايداره موديري يئنه قوللاريني اوينادار، يازيق-يازيق گولومسردي:

-ائه عزيزيم، پول ايستمک اوچون ائله واخت سئچيرسينيز کي…جعمي 5 گون قاباق بوتون پوللاري پايلاديم. من ايندي هاردان تاپيب سيزه پول وئريم آخي؟ اؤزونوزو منيم يئريمه قويون و فيکيرلشين!

ايکي آي بويونجا هئچ سسيمي چيخارمادان آيين موعين گونلرينده مطبعه بيناسینین بئشينجي مرتبهسينه چيخديم. اوچونجو آيا چاتاندا آرتيق سسيمين تونونو قالديرماغا، نئجه دئيرلر طلب ائتمهيه باشلاديم.

ايداره موديري اللري ايله غريبه ايشارهلر جيزير، باشيني اوينادير آما هئچ جور پولو وئرميردي. پول وئرمهیين هئچ ده خوش اولمايان، جانسيخيجي بير عمل اولدوغونو من ده بيليرم. آما آخي بوندان منه نه؟ من اؤز حاقيمي ايستهييرم. بونا گؤره ده توتدوغوم يولدان دؤنمهمي، بو مسلهده سونا قدر گئتمهيه قرار وئرديم.

گئتديکجه آرتان زيارتلريمدن ايداره موديرینین ناراحات اولماغا باشلاديغيني حيس ائديرديم. يازيق آدام منيمله گؤز-گؤزه گلمهمهيه چاليشيردي. باشيني اؤنه اَيير، کاغيذلارين ايچينده ايتيب باتيردي.

آيين بيلميرم نئچهسي ايدي، يئنه اورا گئتميشديم. يانيندا تانيماديغيم بير آدام اوتورموشدو. من اوردا هئچ کيم يوخموش کيمي حرکت ائتديم. ايداره موديريني قورخوتماغا باشلاديم. اونا دئديم کي:

-بسدير آرتيق! يا ائله گونو بو گون پولو وئريرسن يا دا من نه ائدهجگيمي ياخشي بيليرم.

يامان حيرصلنميشديم. عصبدن سسيم تيرهييردي.

بيردن بير هيچقيريق سسي گلدي. قورخو ايله ايداره موديرينه باخديم. يازيق آدام اللري ايله اوزونو توتوب، يانينداکي آداما هئچ فيکير وئرمهدن اوشاق کيمي آغلاييردي.

اونون حالي منه يامان توخوندو. اؤز-اؤزومه لعنت اوخوياراق اوتاقدان چيخديم.

اؤزومه نيفرت ائتمهيه باشلاميشديم. گؤر بئزديريجي حرکتلريمله آدامي نه حالا سالميشديم. من دوغرودان دا پيس و مرحمتسيز آدام ايديم. اينسان بئله ايشلرده آزاجيق آنلاييش گؤسترر. بس نئجه، يازيغين پولو يوخدورسا آخي هاردان تاپيب منه وئرسين؟ يقين کي او اؤزو ده بونا گؤره عذاب چکيردي. ائلهديگيم کوبودلوغا گؤره عوذر ايستمهيه قرار وئرديم. حتّي اونا:

-هئچ کدرلنمه دوستوم، دئيهجکديم.نه قدر لازيمديرسا من گؤزلهيهرم…

باخ بونلاري دئمک اوچون يئنيدن اوتاغا قاييتديم. آما ايچري داخيل اولاندا تجوبدن يئريمدهجه دونوب قالديم. ايداره موديري کرئسلوسونا ياسلانيب قهقهه ايله گولوردو. قارني، بوخاغي، بيغي قهقهه ايله بيرگه تيترهييردي. قاباغينداکي آداما بئله دئديگيني ائشيتديم:

- نه ائدک آي قارداش؟ اؤزون گؤرورسن کي آدامدان گنه کيمي ياپيشيرلار. گلن بير نفر دئييل کي…هانسي بيرينه درد آنلاداسان؟ من ده بو ضررسيز چارهيه باش وورورام. بونلارين اکثريتي يازيچي-شاعير طايفاسيدير. هر شئيدن تئزجه کؤورهليرلر. مني بو حالدا گؤرنده ايسه عوموميتله بورا گلمکلرينه پئشمان اولورلار. منيم ده بير نئچه گون جانيم قورتارير. بو کيچيک حيلهني منه چوخ گؤرمه. آما حئیف کي گلنلرين هئچ ده هاميسي بونون کيمي آخماق اولمور.

سؤزون آخيريني ائشيتمهيه حؤوصلهم چاتمادي. يومروغومو ستولا چيرپديم و تئز پولو وئرمگيني ايستهديم.

ايداره موديري اوزومه باخمادان کاغيذيمين اوستونه "صاباح اؤدهنيلسين" امريني يازدي. صاباحي گون گئتديم و پولومو آلديم.

بو دانيشديغيم حاديثه حقيقتدير. چوخداندير حئکايهلريم اوچون مؤوضولاري حياتدان گؤتورورم.

کؤچورن: عباس ائلچین