ساققاللي اوشاق

ساققاللي اوشاق

جليل محمدقولوزاده

بو حئکايهني ناغيل ائلمهميشدن قاباق بونو ايستهييرم دئيم کي، بير پارا اوشاقلاردا بئله بير پيس خاصيت اولور کي، اللرينه کارانداش دوشن کيمي باشلاييرلار ائوين ديوارلاريني يازماغا. هله چوخوسو کؤمورنن ده، تباشيرنن ده يازير. هله سن کؤمورو و تباشيري دئييرسن، من ائله پيس اوشاق گؤرموشم کي، الينه ميسماري، يا بيچاغي آليب ديوارلاري جيزيب خاراب ائلهيير.

ندنسه، ديوار يازان اوشاقلارنان منيم آرام يوخدو؛ اوندان اؤترو کي، اگر سن ياخشي اوشاقسان و کؤنلون مشق ائلهمک ايستهيير، گؤتور کاغيذي، قلمي، بير يئرده اوتور و نه قدر کئفيندير، ياز.

ايندي کئچک ناغيليميزا:

من ائله بيليرديم کي، بيزيم اوشاقلار اؤزگه اوشاقلار کيمي او قدر ده ديوار يازان دئييللر؛ چونکي چوخ نصيحت ائلهميشديم و اونلار دا منه سؤز وئرميشديلر کي، ديوارلاري يازماياجاقلار. آما آخير واختلاردا گؤردوم کي، بالکونون ديواريندا، قاپينين داليندا بير خلوت يئرده بير بئله شکيل چکيليب؛ دئيهسن، بير حئيوان باشيدير، قولاقلاري دا دئيهسن وار، بير-ايکي آياغي دا وار، آلتيندا بئش دفعه اليف يازيليب و بوندان ساوايي بئش-آلتي يومرو شئي چکيليب. بونلارين هاميسي کارانداش ايله يازيليب، ائله ناشي کوبود يازيليب کي، بونو اوشاقدان ساوايي هئچ کس يازا بيلمز.

خوشوما گلمهدي، چاغيرديم اوشاقلاري:

- اده، گئنه ديوارلاري يازيرسينيز؟

اوچو گلدي دوردو يازينين قاباغيندا.

- هانسينيز يازميسينيز؟

اوچو ده داندي.

- ائلهده پس شئيطان يازيب؟

- دده، واللاه من يازماميشام.

- دده، من ده يازماميشام.

بالاجا قوربان دا "من يازماميشام" دئيه-دئيه اللريني اوزونه قويوب آغلاماغا باشلادي.

من دئيينه-دئيينه بير اسکي تاپيب يازينتي تميزلهديم و دئيينه-دئيينه چکيلديم گئتديم. آما بونو ائشيديرديم کي، حئيدر تئيمورا دئييردي: - سن يازميسان. - تئيمور دا حئيدره دئييردي: - سن اؤزون يازميسان.

بورادا آغلايان اوغلوم قوربان قاچا-قاچا گلدي يانيما، گويا کي، بير بؤيوک خبر گتيريب.

- دده، او يازيني حئيدر يازيب؛ واللاه، دده، حئيدر يازيب.

حئيدر ده آجيقلي-آجيقلي گلدي دوردو قوربانين قاباغيندا و اللريني آتا-آتا ائله هيرسنن جاواب وئردي کي، آز قاليردي اللريني سوخا اوشاغين گؤزونه.

من آجيقلانديم و اوچو ده ساکيت اولوب ايستهديلر گئدهلر، من اونلاري ساخلاديم و بونو دئديم:

من بيرجه بونو سوروشدوم کي، ديوارا يازديغينين معناسي ندير؟

معناسي بو ايميش: کبله عظيم ايستهييرميش بير اينک چکه و اينگين آلتيندا يازديغي بئش جيزيغين معناسي بو ايميش کي، من اونا بئش مانات اينک ياغيندان بورجلو قالديم. گيرده يازيلار يومورتادان قالان بورجومون حسابي ايميش. من گئنه گولدوم و اوشاقلاريمي چاغيرديم و اونلارا بئله دئديم:

- اوشاقلاريم، اوشاقلاريم، گلين، بورا گلين.

اوشاقلار دولوشدولار و گؤزلري ديوارا ساتاشان کيمي چوخ-چوخ تعجوب ائلهديلر و مندن سوروشماغا باشلاديلار:

- دده، بونو کيم يازيب؟

دئديم:

- بالالاريم بو يازيني يازان دا سيزين کيمي اوشاق ايدي؛ آنجاق بيرجه تفاووتونوز اورادادير کي، اونون ساققالي وار، سيزين هله ساققالينيز يوخدور.

اوشاقلار گولوشدولر و معلوم کي، بونلارين گولوشوب شاد اولماقلارينا بؤيوک بير سبب وار ايدي کي، هر بير اوخوجويا آشيکار اولسون گرهک.

کؤچورن: عباس ائلچین

ملانصرالدین (Molla Nsrddin)...