بیر آچیق صمیمی دانیشیق!

اولکه میزین اولمپیک باشجی سی، عابباس ائلچین یله ریو اولمپیکدن سونرا بیر آچیق صمیمی دانیشیق!

ژورنالیست:چوخ خوش گلمیسیز عابباس ائلچین قارداشیمیز، ایلک سواللاری سورمادان اوخوجولاریلا نه دئمک ایسته یرسیز؟

عابباس ائلچین :چوخ ممنونام هم سیزدن همده عزیز اوخوجولاردان ،بیرده بو بویوک اودماقی رییو اولمپیکده اولکه میزه تبریک دئمک ایسته یرم!

ژورنالیست:سیز دییه ن ائله ده قاباقجیل اولمپیکده اولمادیق؟

عابباس ائلچین:یوخ هایلا دئمه یین ،سیزدن بو سوز بعیددی، ائله بایراق داریمیزی نظرده توتولسا بیر ویلچه رلی قیز اینتیخاب ائیله میشدیق. او دورومدا بیر ایدمانچیمیز چادیرالی موحکم قدملرین گوتوروردی، بیزه هر بیر شئی یدی. بیرده اولمپیکه گئتمه ییمیز بیر حوسنو واریدی ،چوخ ریشته لری اوردا تانیدیق- اورگشدیق، بو ریشته لر وار.

ژورنالیست:آخیر چه کیده اولان وزنه برداریده چوخ قولای وضییت ده آسیلی قالدیق. بو ندن اولا بیلر؟

عابباس ائلچین:بو مومکون دئییل بیزلر آخیر چه کیده اولان وزنه لری اینشااللاه سورییادا –یمنده- عراقدا گوتورنده، اوندا بیله جکسیز، نه خبر واریمیش ؟

ژورنالیست: قیلینج اویناتماقدا چوخ گوزل گلمیشدیق ،امما آخیرلاردا چول له دیک ،نه اولموشدی؟

عابباس ائلچین :او ایدمانچی یا اؤزوم سیفاریش ائیله میشدیم ، اودوزسون. اورتا آسییادا دییه رلر: نه خبردی؟ بونلار بئله قیلینج اوینادیللار. باخما اودوزماسینا ائله قهرمانلارا نه وئرمه لیدی، اونادا شامیل اولاجاق!

ژورنالیست: سیزین بو ضعیف ایش آپاردیقیز باعث اولماز ،سیزی اولمپیک مقامیندان کنارا قویالار ؟

عابباس ائلچین:یئنه قایتاریرسیز ضعیف ایشله میشه م، بو سوز دوز دئییل ،منیم دوورومدا بیر آزاد گولشجی میز ،اوتوز ایکی ثانییه ده بیر آبوش گولشجی نین بئلین یئره یاپدی، بو بیزیم قوولوقوموزدا(پرونده میزده) بویوک بیر پواندی .

ژورنالیست:آخی اوبیرسی گولشجی میز آبوش گولشجی سینه اودوزدی.

عابباس ائلچین:او سرعتده حئسابا گلمه ز، هله دئمه دیم: او شوعالارکی اولمپیک اویون یئرلرینده، آذرکشلر وئریردیلر، او الهی دانیشیقلار –راز،نییازلار گئچیتمه لر- جومعه آخشامی دووالاری آموزون چای کناریندا، طنین انداز اولوردی، بیزه هر بیر میدالدان اوسکون ساییلیر. بیرده ایکی کافیر اولمپیک کندینده موسلمان اولدولار در حال بیزیم بایراق آلتیندا یاریشا باشلادیلار،روتبه سی ایرمی دوقوزونجونا باخمایاراق،اونا بیز بیر قهرمان تک باخیریق.

ژورنالیست:یئمه یز ایشمه یز نئجه اولوردی ؟

عابباس ائلچین:یئمه یمیزده اؤز مملکتیمیزدن ،ایکی توناژا یاخین ،ایندییا- پاکیستان دوگوسی، بیر توناژا یاخین اؤز تاجیرلریمیزدن عمله گلمیش اولان ،بریزیل اتی، آزاد بازارلاردان عمله گلن، شیمالی آبوشدان- کانادادان نخود -لوبییا ،کویر مارکالی اولان سو احتییاجاتیمیزی، چوخ گوزل وجهیده باشا آپاردیق. اورانی بیر قورمه سبزی اییی گوتورموشدی کی گل گوره سیز!

ژورنالیست:ائله بیل بیزیم اولمپیک کاروانیندا بیر روانشیناس یوخیدی ؟

عابباس ائلچین:واللاه سیز بوردا دوز دئییرسیز، بیز اوردا بو مطلبی اوخویوب دوشوندوق ، هر بیر کارواندا گره ک بیر روانشیناس اولا، ایه ر بیز ایلک بینادان بونو بیلسه یدیک، بیزده نه بول روانشیناس ،قومدان بیر کاروانا جان هره یه بیر نفر آپاراردیق. بیرده بیزه ائله روانشیناس لازیم اولمور، اؤز اولکه میزدن قاچمیش ایدمانچیلار آیری اولکه بایراق آلتیندا یارش ائدنلره باخاندا ،ایکی قات بیزه قووت وئریب بیز شارز اولوردوق!

ژورنالیست:روتبه میز چوخ اولکه لردن دالی اولدو، بونا نه سوزوز وار؟

عابباس ائلچین:سیز فخر ائدین آز اولکه لردن دالی اولساق، چوخ اولکه لردن دالی قالمامیشیق اونلاردان ایره لیده ییق.

ژورنالیست:بیر جامایکالی بیر آبوشلی ایدمانچی اؤز تک لیقلاریندا بیر اولکه دن چوخ میدال گتیریبلر، بونا نه سوزوز وار؟

عابباس ائلچین:نه سوزوم اولاجاق، آللاه تعالا او آدامی کی ایسته مه ز بو دونیادا هر بیر شئیی باشیندان توکر! امما بیزیم تک آللاه آدامین بو دونیادادا ایمتحانا چکر ، گورسون نئجه رفتاری وار؟ راضی هستیم به رضای پروردیگار!

ژورنالیست:رییو المپیک کاروانیندا اولان شخصلر بیر تهر سیزیله دوسلوقو- قوهوملوقی وار. میثال اوچون: ائلچی بئی کومکچیز، باجاناقین- دوکتور جئری ،کاروانین دوکتوری- قدرت ابولحسنی اذان وئره نیز، کوره کنیز- قزوینلی علیرضا رضایی ،مساژوروز باجی اوغلونوزیدی. چوخلی آداملار کی چیخاردان لیسته وار.

عابباس ائلچین:گئدیب آیری اولکه دن گتیرمه یه جه ییق کی! اونلاردا بو اولکه نین آداملاریدی. بیزیم اولکه نین- مملکتیمیزین بویوک باش باکانلاریمیزا باخاندا، گوروروک ائله بیر- بیریله قوهوم -قارداشدیلار بوجور اولاندا چوخ گوزل اولور ،هر بیر سوز اؤز آرالاریندا قالیر، سوز کنارا چیخمیر.

ژورنالیست:رییو اولمپیکده اوداندا آغلایردی، اودوزاندا، خاص آغالارین آغلامالاری چوخ اوره ک یاندیرانیدی؟

عابباس ائلچین:بو موسلمانین گوزل عمللریندن بیریدی. دوز دئییرسیز آقای خاصصین آغلاماقی منی ده آغلاتدی! ایدمان باشجی سیندان، کتبی صورتده ایسته میشه م اونا بیر قهرمان جاسینا بیر گوزل خاص بیر کادو ،خاص آغلاماقینا گوره نظرده توتولسون!

ژورنالیست:آخیر سوز؟

عابباس ائلچین:ائله بوگوندن قوزانیب گئدیب بویوکلریمیزین حضورونا چاتیب الیندن اوپوب ، گلن دورد ایله فیکیرله شه جه یک!! والسلام علیکم

گرگرلی آراز