عصبی آدام - عزیز نسین

عصبی آدام

عزیز نسین

عصبدن الي – آياغي تير – تير تيترهين ضعیف، قوجا آدامي ايتهلهيهرک پوليس بؤلمهسيندن ايچري سالديلار.

- بو آدامدان شيکايتچيیيک رئیس بي، بيزي تحقير ائتدي. ان باشداکي، ايريتهر جاواندان رئیس سوروشدو:

- نه دئدي؟

- چوخ آغيردي رئیس بي، آتامي قاريشديرماسايدي، وئجيمه آلمازديم. آما رحمتليک آتامي دا قاريشديردي.

قوجا آتيلدي:

-بلي… ائششک اوغلو، ائششک، – دئديم. دانيشيم، لاييقدي يا يوخ، سيز دئيين. مارشروُت تاکسيسينديم. بو جاوان دا آلتين باققالدا ماشينا ميندي. تاکسيمده دوشمهديمي؟ دؤزه بيلمهديم، ياخاسيندان توتدوم. "ماشاللاه، ائششک بويدا آدامسان! گنجسن، گوجون – قووxadّتين يئريندهدي، آلتينباققاللا تاکسيم آراسينداکي مسافهني اؤلچسن بئش يوز آدديم اولماز. اينسان بو قدر يئر اوچون مارشروت تاکسيسينه مينرمي آي ائششک اوغلو ائششک!.." – دئديم. عئينيله بئله دئديم. -اينانميرسينيز، سوروشون اؤزوندن!

اوزون بويلو، قاپي تايي قدر گئنيش کورکلي جاوان، قوجانين سؤزونو تصديقلهدي.

نؤوبهده ساغدان ايکينجي شيکايتچي:

-بو گنج تحقيره لاييق ايدي، – دئدي، آما بو آدام منه ده سؤيدو…

رئیسين سوروشماغيني گؤزلهمهدن قوجا دانيشماغا باشلادي:

-اونا دا "ائششک اوغلو"! – دئديم، آما لاييق ايدي، اؤزو ايستهدي… بو آدام دا تاکسيمده مارشروت تاکسييه ميندي. آغا مسجيدينه چاتانا قدر ايکي سيقارئت چکدي. بس دئييلميش کيمي بيريني يئنه يانديردي. سيقارئتين بيريني سؤندوروب بيريني يانديرير. سيقارئت دومانيندان مارxadشروتون ايچينده گؤز – گؤزو گؤرمور. ايچريده بوغولاجاقديق. هئچ اولماسا پنجرهني آچيم، – دئديم. بو دفعه ده "هاوا سويوقدو، پنجرهني آچما"! دئمزمي؟ باخ، او واخت دؤزه بيلمهديم. مادام کي، هاوا سويوقدو پنجرهني آچماغا ايمکان وئرميرسن، يوْووُزون باجاسي کيمي دايانمادان بورنوندان دومان سووورورسان، مارشروت تاکسيده اوست – اوسته سيقارئت چکيلرمي، آي ائششک اوغلو ائششک.."! – دئديم.

اوچونجو شيکايتچي:

-آدامين آللاهي وار، لاييق ايميش، – دئدي، بئله حؤرمتسيزلره من ده عصبيلشيرم.

رئیس بو آدامدان سوروشدو:

- سيزين شيکايتينيز؟

- افنديم، منه ده… چوخ آغير، ديله گتيرمهيه اوتانديغيم شئيلر دئدي.

قوجا:

-سؤيلهديم، – دئدي، البتته دئيرم. بو آدام قالاتاسارايدان مارشروت تاکسييه ميندي. سانکي قيرخ ايلليک تانيشيق کيمي باشلادي دانيشماغا. دؤرد آدام ايکي اوتاقلي بير ائوده کرايهنيشينلرميش. آروادي آغزينيزا لاييق چوخ ياخشي لوبيا شورباسي بيشيريرميش. قيزيني کئچن ايل ائولنديريب، آما کورکني خئييرسيز چيخيب. آروادي دؤردونجو اوشاغيني قئيصريييه عملياتي ايله چوخ چتين دونيايا گتيريب. ايندي ده بئشينجيسينه حاميله ايميش. گؤرهسن اوشاق اولماماسي اوچون بير تدبير بيليرممي؟ -آرتيق قان بئينيمه سيچرادي. "افندي، افندي" -دئديم، – "باشيندا ساچ، آغزيندا ديش قالماييب، مندن بئتر اولموسان. آروادين هله ده اوشاق دوغورسا، تدبيري سن يوخ، قونشو جاوانلاري، يولداش – دوست گؤرسون… اينسان ياتاق اوتاغيندا باش وئرهني مارشروت تاکسيده راستلاشديغي يادلارا دانيشارمي، آي ائششک اوغلو ائششک"! -دئديم.

نؤوبهدهکي شيکايتچيلردن بيري:

- چوخ ياخشي دئميسن، – دئدي، بئلهلرينه من چوخ عصبيلشيرم.

- سيزين شيکايتينيز؟ – دئيه رئیس او آدامدان سوروشدو.

- رئیس بي، بو آدام مني ده تحقير ائتدي…

قوجا سورغو-سوالسيز:

-ائتديم، – دئدي، البتته ائدرم. بو آدام تپهباشيندا مارشروت تاکسييه ميندي. مينن کيمي هوْچکيس ماکينالي توفنگلري کيمي هئچ دايانمادان آسقيرماغا باشلادي. "هاوالاردان زؤکم اولموشام" -دئدي. هم ده آسقيرارکن نيشان آلير کيمي آختاريب – تاپيب، اينسانين صيفتي يانغين سؤندورن شلانقي کيمي پوسکورور. بير دفعه اوزومو توپورجک ايچرئیسينده بوراخاندا داها دؤزه بيلمهديم: "مادام کي، زؤکم اولدون، هئچ اولمازسا آسقيرارکن آغزينا دسمال توت، دسمالين يوخدورسا الينله آغزيني باغلا. اينسانين صيفتينه آسقيريلارمي؟ آي ائششک اوغلو ائششک"! – دئديم. –اؤزو مجبور ائتمهييبمي رئیس بي؟..

بئشينجي شيکايتچي:

-آي آغزيني اؤپوم، بئلهلرينه دئمهلي البتت… – دئدي.

رئیس بو آداما:

- سيز نه ايستهييرسينيز؟ – دئدي.

- منه ده ديله گتيريلمهسي مومکون اولمايان سؤزلر دئدي.

قوجا:

-سؤيلهديم، – دئدي، – هم ده "ائششک اوغلو ائششک"! – دئديم. بو آدام شيشخانادا ماشيندان دوشدو. باشلادي جيبلريني قاريشديرماغا… هئچ جور پولو قويدوغو يئري تاپا بيلمير. گئديش – گليش واختي… آرخاميزدا تراموايلار، آوتوبوسلار، يوک ماشينلاري، آوتوموبيللر ييغيشدي. يول پوليسي فيت چالير، واقون سورنلر، سوروجولر قيشقيرير. بو آدام هئچ وئجينه آلمير. آغير – آغير جيبلريني قاريشديرير. قاريشديردي، قاريشديردي. پالتوسونون، ژيلئتينين، ژاکئتينين، شالوارينين جيبلرينه باخدي. سونرا "هه تاپديم، بورادايميش"! دئيه ايچ جيبيندن بير يوز ليرهليک چيخاريب سوروجويه اوزاتمازمي؟ صبريم توکندي: "اينسان مارشروت تاکسييه مينديمي، پولونو اولجهدن حاضيرلايار، بو قدر ميلّت يولوندان ساخلانيلماز. اللي قپيک اوچون ده سوروجويه يوز ليره خيردالاتمازلار آي ائششک اوغلو ائششک!" – دئديم.

سوروجو درحال آتيلدي:

-آغزين درد گؤرمهسين، ياخشي کي دئدين، يئردن گؤيه قدر حاقليسان!- دئدي.

رئیس سوروجويه طرف چئوريلدي:

- سيز؟

- من شيکايتچييم بو آدامدان. تحقير ائتدي.

قوجا:

-ائتديم، – دئدي، – "ائششک اوغلو، ائششک"!.. – دئديم. بو سوروجو ماشينيندان دوشن بير قادين پول وئرديکده، "ساغ اول، باجيم"! – دئدي. باشقا بير قادينا، "بويور، آنام"!- دئدي. موشتريلردن بيرينه "عمي" ،بيرينه "دايي" ،بير گنجه "قارداش" – دئدي. بير جاوانا "اوغلوم" ،بير آداما "بي بابا" – دئدي. هئچ بيرينه سس چيخارتماديم. ماشينيندان دوشرکن پولونو اوزاتديم، منه ده "ساغ اول باباليق!" دئمزمي؟ داها دايانماق اولارمي، سؤزون نؤوبهسي گلدي. "تورک ديلينده باي، بايان، خانيم، بي کيمي بير سؤز واردير، بيلميرسنمي؟ من سنين آناني تانيميرام، آرواديني تانيميرام، هاردان آتان اولورام" ماشينينا مينن بوتون موشتريلر سنين قوهوموندورمو، آي ائششک اوغلو ائششک" – دئديم.

رئیس عصبلي قوجايا طرف چئوريلدي:

-بو ايستانبول باخ، بئلهدير، بو ياشا گلميسن بو قدر ايستانبول سکيسيني تاپدالاميسان. مادام کي، بو سولو، تربييهسيز، اؤزونو بيلمز، کوبود حريفلره دؤزه بيلميرسن، بو ياشدا نييه ائويندن چيخيرسان، آي ……..

رئیس بير آز داياندي، فيکيرلشدي. سونرا:

………. آ بَييم!.. – دئيه سؤزونو بيتيردي.

آذربایجان تورکجهسینه اویغونلاشدیران: سئوینج سولئیمان

کؤچورن: عباس ائلچین

برچسبها: تورکیه ادبیاتی, عزیز نسین ملانصرالدین (Molla Nsrddin)...